Halmashauri ya Wilaya ya Mlele yazidi kujipambanua katika uzalishaji wa Zao la kimkakati la Korosho ili kuongeza tija kwa wakulima

Posted on: September 7th, 2021

Wakulima wa Zao  la Korosho  Halmashauri ya Wilaya ya  Mlele Mkoa wa  Katavi wamepatiwa mafunzo ya kilimo cha zao la korosho  kwa lengo la kuongeza uzalishaji wa zao hilo.  Mafunzo hayo yametolewa na Bodi ya Korosho kwa kushirikiana Kituo cha utafiti wa zao la Korosho (TARI Naliendele) , lengo ikiwa ni kuongeza uzalishaji wa zao la korosho na matumizi bora ya viawatilifu kwa ajili  ya kupambana na wadudu waharibifu wa zao la korosho.

Akizungumza wakati wa mafunzo hayo Mtafiti wa zao la korosho kutoka kituo cha Utafiti TARI Naliendele Wiliam Valeri Mbasa ameeleza kuwa lengo kuu la mafunzo ni kuwasaidia wakulima kuongeza udhibiti wa wadudu waharibifu na magonjwa ya zao la korosho. Pia mtafiti alieleza mbinu bora za upuliziaji wa viwatilifu kwenye zao hilo.

Akifafanua zaidi  amesema kuwa   zao la korosho ni miongoni mwa mazao ambayo   ni  tegemeo kwa  uchumi wa Taifa na linaingizia  fedha nyingi  na uhakika wa soko unapatikana kwa urahisi, pia amewahakikishia wakulima kuwasaidia katika hatua ya ubanguaji wa zao hilo.

Naye Mandela Chikawe ni Mtaalam kutoka  Bodi ya Korosho  Mtwara ameeleza kuwa wao kama bodi ya korosho  wanahitaji wakulima wauze korosho iliyobanguliwa  lengo ni kuongeza thamani ya zao la korosho nchini pia mtalam huyo amesema bodi itazidi kuwapatia wakulima elimu ya zao hilo  ikiwa ni pamoja na mafunzo ya awali hadi pale korosho itakapovunwa.

 Akizungumzia  hali ya uzalishaji wa zao la korosho nchini  amesema kila mwaka uzalishaji umekuwa ukipungua kutoka tani laki 3, ikaja tani laki 2,  na mwaka jana uzalishaji ulikuwa tani  210,000.

 Pamoja na kuongezeka kwa upandaji wa zao la korosho uzalishaji   umeendelea kupungua kila mwaka kutokana na changamoto mbalimbali ikiwemo upungufu wa viwatilifu na mashine za kumwagilia.

Kwa Upande wake Afisa Kilimo Ushirika na Umwagiliaji Halmashauri ya Wilaya ya Mlele Luke Kifyasi kwanza ameishukuru serikali ya Awamu ya sita inaoongozwa na mama Samia Suluhu Hasan kwa kushirikiana na Bodi ya Korosho Pamoja na Kituo cha utafiti wa zao la Korosho TARI Naliendele  kusaidia mbegu bora za zao la Korosho kwa wakulima wa Halmashauri ya Wilaya ya Mlele.

 Amesema zaidi ya wakulima 760 katika Halmashauri ya Mlele wamefanikiwa kulima zao la korosho katika eneo lenye ekari 120, na miche ambayo imepandwa hadi sasa ni 36,320 miche hiyo ikiwa katika hatua tofauti tofauti, pia amesema uzalishaji wa zao la korosho utaongeza tija kwa wakulima kwa kuwainua kiuchumi na kuongeza  mapato ya  serikali.

Washiriki wa mafunzo hayo kwa nyakati tofauti  wameishukuru serikali ya Awamu ya sita inaoongozwa na mama Samia Suluhu Hasan kwa kupatiwa miche pamoja na elimu kuhusiana na matumizi ya viwatilifu na mbinu za upuliziaji, wakulima hao wamesema mafunzo waliyoyapata yatakuwa chachu na tija katika uzalishaji wa zao la korosho kwenye wilaya ya Mlele.

 Naye Leonard Kiyungi Mkulima toka kijiji cha Kamsisi, Visenti Vitus kutoka Inyonga na Mtaalam wa ugani kutoka ngazi ya Kata  Esabela Pastol wameeleza kufurahishwa na mafunzo hayo wakasema watayatumia kwa malengo yaliyokusudiwa kuongeza uzalishaji wa zao la korosho.