MAONESHO YA MATOKEO YA MASHAMBA DARASA MLELE

Posted on: April 12th, 2017

MAONESHO YA MATOKEO YA MASHAMBA DARASA

Na Sebastian Haule                                                      Mlele                                          13/04/2017

Kaimu Mkurugenzi Mtendaji wa Halmashauri ya Wilaya ya Mlele Albert Samweli Moshi amewataka wakulima kulima kilimo cha kibiashara katika kutekeleza kaulimbiu ya hapa kazi tu na  kufikia mwelekeo wa nchi ya  viwanda mwaka 2020-2025.

Akiongea kwenye maonesho ya matokeo ya mashamba darasa yaliofanyika katika kijiji cha Inyonga Wilaya ya Mlele Moshi alisema kuwa ili nchi iwezekufikia kuwa nchi ya viwanda wakulima hawana budi kulima kilimo cha kibiashara ambacho kitaweza kuzalisha malighafi ya kutosha za kulisha viwanda hivyo.

Moshi amewaeleza wakulima kuwa ili kufikia malengo ya kuzalisha malighafi za kutosha ni lazima wazingatie kanuni bora za kilimo ambazo ni pamoja na kuandaa shamba kwa wakati, kupanda mbegu bora, kupanda kwa nafasi, kutumia mbolea ya kupandia na kukuzia, kupalilia kwa wakati, kuvuna kwa kufuata taratibu, kuhifadhi vizuri na kufuata ushauri wa wataalamu wa kilimo.

Aliongeza kusema ili mkulima aweze kuzimudu kanuni za kilimo bora anatakiwa kushiriki kikamilifu katika mashamba darasa yaliyo katika maeneo yao hatua kwa hatua na kuhamishia ujuzi huo  kwa kuifundisha familia yake katika mashamba ya familia husika.

Kampuni ya MERU ambayo ni mzalishaji wa mbegu za mahindi kupitia mwakilishi wake Gustav Hofi alifafanua kuwa mbegu bora ni zile zilizozalishwa na wataalamu hivyo akawataka wakulima kuachana na kilimo cha mazoea ambacho hutumia mbegu ambazo zimezalishwa na mkulima katika msimu uliopita hali inayosababisha kuwa na mavuno haba.

Filibert Misigaro Mwakilishi wa Taasisi ya RUCODIA alieleza kuwa maonesho ya matokeo ya mashamba darasa yalikuwa na lengo la kumfanya mkulima kuwa na uelewa wa kutosha juu ya kilimo bora cha kibiashara pamoja na matumizi ya pembejeo katika mashamba yao.

Molisi Pius ni mkulima katika kata ya ilela Wilaya ya Mlele alishauri kuwa mashamba darasa yawekwe katika kila kitongoji ili kuraisisha upatikanaji wa elimu ya matumizi bora ya kanuni za kilimo bora.

Halmashauri ya Wilaya ya Mlele kupitia idara ya kilimo, mifugo na wadau mbalimbali kama vile Kampuni ya MERU,Taasisi ya RUCODIA, Kampuni ya YALA na  Export Trade ilitengeneza mashamba darasa kumi na tatu katika kata zote za halmashauri katika msimu huu wa kilimo.