Mhe.DC Sanga azungumza na wananchi kuhimiza kuhesabiwa

Posted on: September 5th, 2022

Pichani:Mkuu wa Wilaya ya Mlele Mhe.Filberto Sanga  akizungumza na Wananchi wa Kata ya Utende Kijiji cha Utende Kitongoji cha Kafulu  katika ziara ya kuhimiza uandikishaji wa mbolea za ruzuku na sensa ya watu na makazi  mwishoni mwa wiki.

Mlele–Katavi

Mkuu wa Wilaya Mlele Mhe.Filberto Sanga  ametaka wananchi waendelee  kujitokeza kwa wingi kujisajili ili waweze kunufaika na mbolea ya Ruzuku,huku akiwakumbusha wale ambao hawajahesabiwa kuhesabiwa

Ametoa rai hiyo  kwa  Wakulima wa Halmashauri ya Wilaya ya Wilaya ya Mlele katika Kijiji cha Utende katika ziara  kutoa elimu na kuhamasisha wananchi umuhimu wa kuhesabiwa na kujiorodhesha ili kupata mbolea ya ruzuku ambayo itawasaidia wakulima kununua kwa bei nafuu tofauti na hapo  Serikali ilipokuwa haijaweka ruzuku mkulimaaaaa alikuwaa akinunua kwa bei  kubwasasa kuna unafuu.

Mhe Sanga amewaambia Wananchi wa Kata ya Utende kuwa wakati zoezi la Sensa ya watu na makazi ikiendelea  pia zoezi la usajili wa Wakulima kwa ajili ya kupata mbolea ya Ruzuku ambapo amewataka kutoa ushirikiano kwa kujisajili kwa kuwa mbolea hiyo itatolewa kwa Wakulima waliojisajili peke yake.

Ameeleza kuwa lengo la Serikali kulipia karibia nusu ya bei ya pembejeo hizo za kilimo ni kujenga mazingira wezeshi kwa wakulima ili kuleta tija katika uzalishaji na hivyo kuwakwamua Wananchi hususani wakulima na Umasikini.

“Mhe.Rais amelipia karibia nusu ya bei ya mbolea na hiyo pesa ambayo Mhe.Rais ameilipia hautadaiwa wala kukatwa kinachotakiwa ni wewe kujisajili ili kuweza kunufaika na pembejeo hizo”alisema Mkuu wa Wilaya Sanga.

Mnamo Tarehe 17 Mei 2022 Waziri wa Kilimo Mh.Hussein Bashe katika hotuba yake Bungeni katika Kikao cha 13 Mjini Dodoma alieleza kuwa Shilingi Bilioni 150 zimetengwa na Serikali kupitia Wizara ya Kilimo kwa ajili ya kutoa Ruzuku ya mbolea kwa wakulima wa mazao yote Nchini kwa masimu wa Kilimo 2022/2023.

Tayari katika baadhi ya maeneo Nchini Wakulima wamejisajili na wameanza kupata Mbolea ya Ruzuku.

MWISHO.