Mhe.Mashimba Ndaki Mwenyekiti wa Tume ya kutatua migogoro ya Ardhi

Posted on: October 13th, 2022

Mhe.Mashimba Ndaki Mwenyekiti wa Tume ya Mawaziri Nane iliyoundwa kutatua migogoro ya Ardhi akizungumza  katika ukumbi wa Manispaa ya Mpanda  baada ya kuwasili Mkoani Katavi kwa ajili ya ziara kutatua migogoro ya ardhi.

Maeneo ambayo yameonekana kuwa na migogoro ya ardhi mkoani Katavi,Serikali imeridhia kufanyia uhakiki upya na  ugawaji wa maeneo hao ili  kuja na suluhu ya kudumu ya kuondoa Migogoro hiyo.

 Akizungumza baada ya kutembelea baadhi ya maeneo hayo ikiwemo eneo la Visima Viwili lililopo katika Kata ya Kasekese wilayani Tanganyika,Mwenyeketi wa kamati ya mawaziri wa nane wa kisekta ambaye ni Waziri wa Mifugo na Uvuvi,  Mhe.Mashimba Ndaki ameelekeza kufanyika upya tathmini kwa maeneo yote Mkoani Katavi yenye migogoro ya mipaka baina ya Wananchi na Mamlaka za Uhifadhi ili kuja na suluhu ya kudumu ya kuondoa Migogoro hiyo.

 Mhe.Ndaki amewaomba Wananchi  Mkoani Katavi kuepuka kuendelea kufanya shughuli za makazi katika maeneo ambayo hawana uhakika wa kuendelea kuishi ili kuepuka usumbufu na wakati mwingine  na hasara zisizokuwa na ulazima.

Mkuu wa Mkoa wa Katavi Mhe.Mwanamvua Mrindoko akizungumza wakati wa utambulisho aliiomba tume hiyo ya Mawaziri Nane inayozunguka Nchi nzima kutatua Migogoro mbalimbali ya ardhi kuharakisha utatuzi wa migogoro mbalimbali ya ardhi inayoendelea baina ya Wananchi na maeneo ya hifadhi Mkoani Katavi ili kutoa fursa kwa Wananchi kufanya maandalizi ya mashamba kwa wakati ili kuendana na msimu wa Mvua ambao umekaribia.

Wananchi nao kwa upande wao wameomba kamati hiyo kushughulikia kwa haraka jambo hilo ambalo limekuwa likisababisha migogoro inayojirudiarudia.

Kamati hiyo ya Wizara nane za kisekta imeundwa na Wizara ya Maliasili na Utalii, Wizara ya Ardhi Nyumba na Maendeleo ya Makazi, Wizara ya Kilimo na Ushirika, Wizara ya Mifugo na Uvuvi, Ofisi ya Rais TAMISEMI na Ofisi ya Makamu wa Rais (Mazingira)kwa ajili ya kutembelea maeneo yenye migogoro ya ardhi nchini na baadae kutoa mapendekezo ya namna ya kusuluhisha migogoro hiyo.

Imeandaliwa na Kitengo cha Mawasiliano Serikali Wilaya ya Mlele.