USAFI SOKONI

Posted on: January 6th, 2025

WAFANYABIASHARA WA VYAKULA WASISITIZWA KUFANYA USAFI.

Wafanyabiashara wa soko la kuuza vyakula Halmashauri ya Wilaya ya Mlele kupitia kwa viongozi wake wamesisitizwa kufanya usafi wa mara kwa mara ndani ya soko hilo ili kuepukana na hatari ya kuzuka kwa magonjwa kama Kipindupindu.

Wamekumbushwa majukumu hayo januari 7, 2025 na Mkuu wa Idara ya Viwanda, Biashara na Uwekezaji Mkoa ndugu Florence Chrisant wakati alipotembelea Halmashauri ya Mlele na Kukabidhi jumla ya Vitambulisho 99 vya wajasiliamali kwa Afisa Biashara wa Mlele Datus Simtengu na baadae kutembelea eneo la soko linalopatikana katikati ya mji maarufu kwa jina la Madukani na kutoa ushauri kuwa usafi unapaswa kufanyanyika mara kwa mara ili mazingira yawe salama kwa wafanyabiashara wenyewe na wanunuzi.

Ndugu Florence Chrisant alipata wasaa wa kuongea na Viongozi wa Soko hilo kwa uwakilishi na kusikiliza baadhi ya changamoto ambazo mara nyingi zimekuwa zikijitokeza lakini kwa jitahada za Serikali pia zimekuwa zikitafutiwa ufumbuzi haraka iwezekanavyo.

Changamoto zilizotajwa na Mwenyekiti wa Soko ndugu Raphael Msiluka ni pamoja na miundo mbinu ambao imekuwa ikaharibiwa na mvua pale zinaponyesha, uzoeaji wa taka, uboreshaji wa vibanda, kuwaondoa ndege wanaosababisha uchafu kutua kwenye miti iliyo katikati ya soko.

Hata hivyo changamoto zote zilizotajwa na viongozi zipo katika hatua ya utatuzi ambapo Afisa Biashara Mlele amewahakikishia Viongozi hao kushirikiana kwa pamoja kufanya usafi wa mazingira na kuzoa taka zote kuzipelekea sehemu husika.

Afisa biashara Florence Chrisant amesisitiza pia kuwepo na ushirikishwaji wa wafanyabiashara katika kufanya maamuzi ya uboreshaji wa soko ili liwe zuri lenye hadhi ya Wilaya, pia amewasihi Maafisa biashara kuwa marafiki na wateja wao ili kuweza kushaurini na kutoa maamuzi ya pamoja katika kujenga.

Ametoa pongeza kwa Mkurugenzi Mtendaji wa Halmshauri ya Mlele Bi Sigilinda Mdemu kwa kushirikiana na Maafisa Biashara kupata jumla ya vitambulisho 99 vya wajasiliamali.