Wananchi wa Kata ya Ilunde mjitolee kushiriki Shughuli za Kijamii- Rachel Kasanda

Posted on: May 3rd, 2018

Wananchi wa kata ya Ilunde Halmashauri ya Wilaya ya Mlele Mkoa wa Katavi wametakiwa kushiriki vyema katika Shughuli za kijamii hususani Ujenzi wa Zahanati ya Ilunde ili kupunguza vifo vya watoto na akina mama wajawazito

Wito huu umetolewa na Mkuu wa Wilaya ya Mlele Rachel Kasanda katika mkutano wa hadhara uliofanyika katika viwanja vya Ofisi ya Afisa Mtendaji kata Ilunde wakati wa  ziara ya kukagua shughuli na Miradi ya Maendeleo mapema wiki iliyopita

“Ni jambo la kizalendo kwa mwananchi kujitoa na kushiriki vyema katika Shughuli za kijamii hususani Ujenzi wa Zahanati ya Ilunde ili kupunguza vifo vya watoto na akina mama wajawazito” alisema Mkuu wa wilaya.

Rachel Kasanda ametoa onyo kwa viongozi watakaobainika kulamba fedha za michango ya wananchi zitakazotolewa kwa lengo la kukamilisha Ujenzi wa Zahanati.

Kwa niaba ya wananchi Diwani wa Kata ya Ilunde Mh Martin Mgoloka amemuhakikishia Mkuu wa Wilaya kutekeleza maagizo yaliyotolewa na kuwaasa viongozi wa kata ya Ilunde kufanya kazi kwa mujibu wa sheria.

Katika ziara hiyo Mkuu wa Wilaya aliendesha harambee ya kuchangia Ujenzi wa Zahanati ambapo yeye alichangia mifuko 12 ya simenti huku wananchi wakitoa ahadi ya kuchangia simenti na vifaa vinginevyo.