MAPOKEZI MWENGE WA UHURU MLELE

Posted on: September 26th, 2025

KIONGOZI WA MBIO ZA MWENGE KITAIFA MWAKA 2025 AKOSHWA NA MIRADI YA MAENDELEO WILAYANI MLELE

Na Kitengo Cha Mawasiliano Serikalini Halmashauri ya Wilaya ya-Mlele,

 Kiongozi wa Mbio za Mwenge wa Uhuru Kitaifa, leo ameeleza kuridhishwa kwake na utekelezaji wa miradi ya maendeleo inayotekelezwa na Halmashauri ya Wilaya ya Mlele kupitia Idara ya Maendeleo ya Jamii, akieleza kuwa miradi hiyo inaonyesha dhamira ya dhati ya serikali katika kuinua maisha ya wananchi.

Akiwa katika ziara ya kukagua na kuweka mawe ya msingi katika miradi mbalimbali, kiongozi huyo alionesha kufurahishwa na utekelezaji wa mradi wa nishati safi ya kupikia, ambao unalenga kupunguza matumizi ya kuni na mkaa, hivyo kulinda mazingira na kuboresha afya ya jamii, hususan wanawake na watoto.

"Nimevutiwa sana na mradi huu wa nishati safi ya kupikia. Huu ni mfano bora wa jinsi serikali inavyoweza kushirikiana na jamii kutatua changamoto za muda mrefu kama uharibifu wa mazingira na matatizo ya kiafya yanayotokana na moshi wa kuni na mkaa," alisema kiongozi huyo.

Aidha, alitumia fursa hiyo kuipongeza Halmashauri ya Wilaya ya Mlele kwa kutoa mikopo kwa vijana, akibainisha kuwa hatua hiyo ni ya msingi katika kuwawezesha kiuchumi na kupunguza tatizo la ajira.

"Vijana wakipewa fursa kama hizi, wanakuwa chachu ya maendeleo katika jamii. Nawapongeza viongozi wa Halmashauri kwa kutambua umuhimu wa uwezeshaji wa vijana na kuhakikisha fedha za mikopo ya asilimia kumi zinawafikia walengwa," aliongeza.

Kiongozi huyo aliwahimiza wananchi wa Mlele kuendeleza mshikamano, amani na utulivu, huku akisisitiza umuhimu wa kushiriki kikamilifu katika shughuli za maendeleo na kulinda miradi inayotekelezwa kwa manufaa ya vizazi vijavyo.