SOUD MLOLWA ANG'ARA TENA, KUENDELEA KUONGOZA HALMASHAURI YA MLELE

Posted on: December 2nd, 2025

SOUD MLOLWA ANG'ARA TENA, KUENDELEA KUONGOZA HALMASHAURI YA MLELE

Mkutano wa kwanza wa Baraza la Madiwani la Halmashauri ya Wilaya ya Mlele tangu kuvunjwa kwa baraza wahitimishwa kwa mafanikio, kwa kuchagua tena Diwani wa Kata ya Inyonga, Mheshimiwa Soud Mbogo Mlolwa, kuwa Mwenyekiti wa Halmashauri hiyo kwa awamu nyingine. Uchaguzi huo umeashiria imani ya baraza jipya katika uongozi na dira ya maendeleo ya mheshimiwa huyo.

Katika uchaguzi huo, Mheshimiwa Oscar William Maganga naye amechaguliwa kuwa Makamu Mwenyekiti wa Halmashauri ya Wilaya ya Mlele. Hali ambayo imeaamsha matumaini mapya ya kuimarishwa kwa utendaji na ushirikiano katika kutekeleza shughuli mbalimbali za maendeleo ndani ya wilaya.

Wakati wa kikao hicho muhimu, madiwani nane wameapishwa rasmi na kukabidhiwa majukumu yao baada ya kutimiza taratibu za kiapo cha uadilifu na kujaza fomu za maadili ya uongozi. Hatua hiyo imefungua njia ya kuanza kutekeleza majukumu yao kwa mujibu wa sheria, kanuni na taratibu.

Aidha, baraza hilo limeunda na kuteua kamati mbalimbali za kudhibiti na kusimamia shughuli za Halmashauri, hatua inalenga kuongeza ufanisi na uwajibikaji katika utekelezaji wa miradi na shughuli za maendeleo kwa manufaa ya wananchi wa Mlele.

Kwa upande mwingine, taarifa ya utekelezaji wa maamuzi ya Halmashauri kipindi ambacho baraza lilikuwa limevunjwa imewasilishwa na kupokelewa vizuri. Mkurugenzi Mtendaji wa Halmashauri ya Wilaya ya Mlele, Bi Siglinda Mdemu, pamoja na timu yake ya menejimenti (CMT), wamepongezwa kwa usimamizi madhubuti na utekelezaji mzuri wa majukumu kwa kipindi chote ambacho Halmashauri ilikuwa inafanya kazi bila baraza.