WASIMAMIZI WA VITUO VYA KUPIGIA KURA WAASWA KUWA WAADILIFU

Posted on: October 27th, 2025

 Na Kitengo cha Mawasiliano -Mlele.

Oktoba 27'2025

WASIMAMIZI WA UCHAGUZI MLELE WAASWA KUWA WAADILIFU NA WAZALENDO

Wasimamizi na wasaidizi wa vituo vya kupigia kura katika Jimbo la Katavi, Halmashauri ya Wilaya ya Mlele, wameaswa kuwa wazalendo, waadilifu, na kufuata sheria, kanuni na taratibu zote za uchaguzi ili kuhakikisha zoezi hilo linafanyika kwa amani na ufanisi mkubwa.Akizungumza wakati wa mafunzo kwa wasimamizi hao, Mkuu wa Taasisi ya Kuzuia na Kupambana na Rushwa (TAKUKURU) Wilaya ya Mlele, Bi. Leonida Mshema, amewataka washiriki kuepuka vitendo vyote vya rushwa vinavyoweza kuharibu mchakato wa uchaguzi, akisisitiza kuwa kufanya hivyo ni kosa kisheria.

“Ni muhimu kila mmoja wetu akatambua kuwa rushwa ni adui wa haki na maendeleo. Taifa limetumia fedha zake za ndani kugharamia uchaguzi huu, hivyo tuoneshe uzalendo kwa kufanya kazi kwa uadilifu na kutunza heshima ya nchi yetu.

Bi. Mshema ameongeza kuwa Tanzania imepiga hatua kubwa kwa kuendesha uchaguzi kwa fedha za ndani bila kutegemea misaada ya nje, hivyo ni wajibu wa kila mshiriki kuhakikisha mafanikio hayo hayapotei kwa vitendo vya rushwa au upendeleo.

Kwa upande wake, Mkuu wa Usalama wa Taifa Wilaya ya Mlele, Bw. Kasuku Mwita, amepongeza wasimamizi hao kwa kuteuliwa kushiriki katika zoezi hilo, akisema hatua hiyo ni ishara ya uzalendo na uaminifu waliouonesha kwa taifa.

“Wilaya ya Mlele iko salama, Mkoa wa Katavi uko salama na taifa kwa ujumla lipo salama. Tunawaomba muwe waadilifu, mzingatie maelekezo, na msishabikie mambo yanayoweza kuvuruga amani wakati wa uchaguzi.

Viongozi hao wametoa wito kwa wasimamizi wote wa vituo vya kupigia kura kuhakikisha wanatekeleza majukumu yao kwa weledi, uaminifu na uzalendo ili uchaguzi uwe huru, wa haki na wenye kuleta matokeo chanya kwa taifa.