KIKAO CHA WAFANYABIARA NA MKURUGENZI MTENDAJI

Posted on: October 4th, 2025

Kikao maalum cha wafanyabiashara wa mji wa Inyonga, kimefanyika katika ukumbi wa mikutano wa Kituo cha Uwezeshaji Wananchi, kikihusisha pia Mkurugenzi Mtendaji wa Halmashauri ya Wilaya ya Mlele pamoja na Kamati ya Ulinzi na Usalama ya Wilaya hiyo. Lengo la kikao hicho lilikuwa ni kusikiliza na kujadili changamoto mbalimbali zinazowakabili wafanyabiashara katika utekelezaji wa shughuli zao za kila siku.

Mwenyekiti wa wafanyabiashara katika mji wa Inyonga, Bw. Aniseth Lusambo, kwa kushirikiana na Katibu Msaidizi wa chama hicho, waliwasilisha hoja mbalimbali kwa nyakati tofauti, wakibainisha vikwazo vinavyokwamisha maendeleo ya biashara katika eneo hilo. Miongoni mwa changamoto kubwa waliyoibua ni ubovu wa miundombinu katika eneo la kushushia mizigo, hasa kwenye stand ya malori.

Walisema kuwa hali ya miundombinu hiyo isiyoridhisha imekuwa ikisababisha usumbufu kwa wasafirishaji wa mizigo na pia inachangia ucheleweshaji wa shughuli za upakuaji wa bidhaa, hali inayowaathiri moja kwa moja wafanyabiashara na wateja wao. Hali hiyo pia imeelezwa kuwa kikwazo kwa ustawi wa uchumi wa mji huo unaokuwa kwa kasi.

Kwa upande wake, Mkurugenzi Mtendaji wa Halmashauri ya Wilaya ya Mlele ameahidi kulifanyia kazi suala hilo kwa kushirikiana na wadau mbalimbali, ikiwa ni pamoja na kuhakikisha maboresho ya haraka ya miundombinu katika maeneo yenye changamoto ili kuwezesha mazingira bora ya kufanyia biashara nay kuchochea maendeleo ya kiuchumi wilayani humo

Kikao hicho kilihitimishwa kwa maazimio kadhaa, ikiwemo kuanzishwa kwa kamati ya pamoja kati ya halmashauri na wafanyabiashara, kutoa elimu ya biashara kwa wajasiriamali wadogo, na kupitia upya baadhi ya tozo zinazolalamikiwa.