DC MLELE AONGOZA WANANCHI KUFANYA USAFI

Posted on: September 6th, 2025

Mkuu wa Wilaya ya Mlele Majid Mwanga akishikiana nan a wananchi kufanya usafi kama ishara ya kuhamasisha ushiriki wa pamoja.

Na Kibada Ernest-  Mkuu wa Kitengo cha Mawasiliano

MKUU WA WILAYA YA MLELE AZINDUA KAMPENI KABAMBE YA USAFI WA WA MAZINGIRA 

Mkuu wa Wilaya ya Mlele Mhe.Majid Mwanga amezindua rasmi kampeni ya usafi wa mazingira wilayani humo huku akitoa wito kwa wananchi kushiriki kikamilifu  katika kuhakikisha mji unakuwa safi na salama kwa afya ya wote.

Akizungumza wakati wa uzinduzi huo,Mkuu wa wilaya amesisitiza umuhimu wa ushirikiano baina ya wananchi na vikundi vya usafi,hususani vile vya kina mama ambavyo vimeanzishwa katika Maeneo mbalimbali kwa lengo la kudumisha usafi wa Mji na Mitaa.

Kwa niaba ya Mkurugenzi Mtendaji wa Halmashauri ya Wilaya ya Mlele Bi. Sigilinda Mdemu,Mkuu wa Divisheni ya Maendeleo ya Jamii  Halmashauri ya Wilaya ya Mlele Bw.Ignas Kikwala  amesema Halmashauri kupitia Divisheni ya Maendeleo ya jamii imeunda vikundi  vya kina Mama vinavyoshughulika na usafi ili kuimarisha hali ya usafi na mazingira bora.

Ameongeza kuwa Halmashauri  imewapatia mafunzo Maalumu yaliyotolewa na  Kitengo cha Usafi na udhibiti wa taka ngumu  pamoja na vifaa vya kufanyia usafi ili kuhakikisha vikundi hivyo vinatimiza majukumu yao kwa ufanisi.

Akizungumza kwa niaba ya vikundi hivyo mmoja ya wanakikundi cha usafi  cha wanawake walioshiriki kwenye uzinduzi  huo ametoa shukurani kwa Serikali kwa kutambua umuhimu wao na kuwapa nafasi ya kushiriki katika shughuli muhimu kama hizi,wamewahimiza wanawake wenzao kushirikiana nao ili kufanikisha azma ya kuwa na Mji msafi na mazingira bora kwa afya ya jamii nzima.

                                                      .Mkuu wa Milaya ya Mlele Majidi Mwanga akiendesha trekta lililobeba uchafu wakati wa uzinduzi wa kampeni ya usafi.

.                                                                               Baadhi ya wananchi wakiwa katika harakati za kuokota taka  kufanya usafi katika  mitaa ya mji wa mlele 

                                                          .Wananchi wa Mlele wakishiriki katika zoezi la usafi wa mazingira kwa kuzoa taka kandokando mwa Barabara.

                                                                   (Picha zote na Kitengo cha Mawasiliano Serikalini Mlele.)

Kampeni hiyo imepokelewa kwa mwitiko chanya kutoka kwa wananchi wa Mlele ambao walijitokeza kwa wingi kushiriki katika shughuli mbalimbali za usafi kama kufagia,kuzoa taka na kusafisha Maeneo ya masoko,kwenye makazi na barabarani

Mkuu wa wilaya pia alionekana akiendesha  trekta lililokuwa likikusanya taka hatua iliyoongeza hamasa na kuonesha mfano wa uongozi kwa vitendo.

MWISHO.