Neema ya Mgao wa Bil 1.5 kuwanufaisha watanzania

Posted on: June 28th, 2018

Rais wa Jamhuri ya Muungano wa Tanzania Mhe. Dkt. John Pombe Magufuli tarehe 21 Juni, 2018 amepokea gawio la Serikali la Shilingi Bilioni 1.5 kutoka Shirika la Mawasiliano Tanzania (TTCL) na amezindua upanuzi wa huduma zake nchini.

Hafla ya kupokea gawio na kuzindua huduma hizo imefanyika katika ukumbi wa Kituo cha Kimataifa cha Mikutano cha Julius Nyerere Jijini Dar es Salaam na kuhudhuriwa na viongozi mbalimbali wakiwemo Waziri wa Ujenzi, Uchukuzi na Mawasiliano Prof. Makame Mbarawa Mnyaa, Wajumbe wa Kamati ya Kudumu ya Bunge ya Miundombinu, viongozi wakuu wa vyombo vya Ulinzi na Usalama na viongozi wa Mkoa wa Dar es Salaam wakiongozwa na Mkuu wa Mkoa huo Bw. Paul Makonda.

Katika hafla hiyo Mhe. Rais Magufuli pia amezindua huduma ya mikutano mtandao (Video Conference) kwa kuzungumza moja kwa moja kupitia luninga na Makamu wa Pili wa Rais wa Zanzibar Mhe. Balozi Seif Ali Idd akiwa Zanzibar na Waziri Mkuu Mhe. Kassim Majaliwa Majaliwa akiwa Dodoma.

Mkurugenzi Mkuu wa TTCL Bw. Waziri Kindamba amemshukuru Mhe. Rais Magufuli kwa jitihada kubwa alizozifanya kuiimarisha TTCL katika kipindi kifupi cha tangu aingie madarakani hali iliyoiwezesha TTCL iliyokuwa inapata hasara, kuzalisha faida ya Shilingi Bilioni 28.5 na hivyo kutoa gawio la Serikali la Shilingi Bilioni 1.5.

Bw. Kindamba amebainisha kuwa kwa hivi sasa TTCL inajiendesha yenyewe, inalipa kodi za Serikali na katika kipindi kifupi imefanikiwa kuanza kutoa huduma za mawasiliano kwa teknolojia ya kisasa na kwa gharama nafuu ikiwemo huduma ya data (4G, 3G na 2G), huduma za kifedha kwa njia ya simu (T-Pesa), mikutano mtandao (Video Conference) na mawasiliano ya simu kupatikana nchi nzima.

Nae Mwenyekiti wa Bodi ya TTCL Mhandisi Omary Nundu amesema juhudi kubwa zilizofanyika zimeiwezesha TTCL iliyopata hasara ya Shilingi Bilioni 19 mwaka 2015/16 kuzalisha faida ya Shilingi Bilioni 28.5 mwaka 2017/18, zimetoa fundisho kuwa mashirika ya umma yanaweza kuzalisha faida na hivyo amemuahidi Mhe. Rais Magufuli kuwa bodi yake itasimamia ipasavyo maendeleo ya shirika hilo.

Kwa upande wake Mwenyekiti wa Kamati ya Kudumu ya Bunge ya Miundombinu Mhe. Suleiman Kakoso amempongeza Mhe. Rais Magufuli kwa jitihada zake za kuifufua TTCL na kufuatilia hisa za Serikali asilimia takribani 40 zilizopo katika kampuni ya simu ya Airtel, na amemuahidi kuwa Wabunge watamuunga mkono katika juhudi za kuiimarisha TTCL na mashirika mengine ya umma.

Waziri wa Ujenzi, Uchukuzi na Mawasiliano Prof. Makame Mbarawa Mnyaa amemshukuru Mhe. Rais Magufuli kwa Serikali kutoa fedha kiasi cha Shilingi Bilioni 14.9 kwa ajili ya kununua hisa za TTCL zilizokuwa zikimilikiwa na mbia (Bharti Airtel) na hivyo kuliwezesha shirika hilo kuwa mali ya Serikali kwa asilimia 100, na kusamehe deni la takribani shilingi Bilioni 100, hali ambayo imeiwezesha TTCL kusimama na kupiga hatua za haraka.

Katika hotuba yake Mhe. Rais Magufuli ameipongeza TTCL kwa mafanikio makubwa iliyoyapata katika kipindi kifupi na amesema gawio la Shilingi Bilioni 1.5 lililotolewa kwa Serikali katika kipindi cha miaka 2 limeonesha kuwa kwa miaka 17 ambayo TTCL haikutoa gawio na ilikuwa ikipata hasara na kulikuwa na upotevu mkubwa wa fedha.

Ameipongeza bodi ya TTCL na wafanyakazi kwa kuchapa kazi kulikowezesha mafanikio makubwa ya shirika ikiwemo kuongeza wateja wa simu kutoka 247,000 hadi 800,000, na kwa namna ya pekee amempongeza Mkurugenzi Mkuu wa TTCL Bw. Waziri Kindamba kwa kudhirisha kuwa vijana wakipewa nafasi wanaweza kuleta mageuzi yenye manufaa makubwa kwa Taifa.

Mhe. Rais Magufuli amemuagiza Msajili wa Hazina Bw. Athumani Selemani Mbuttuka kuhakikisha taasisi zote 91 zinazopaswa kutoa gawio la Serikali zinafanya hivyo na zitakazoshindwa achukue hatua stahili.

“Kwa sasa ni chini ya mashirika 50 kati ya 91 ndio yanatoa gawio kwa Serikali, mathalani mwaka 2014/15 ni mashirika 24 tu ndio yalitoa gawio la shilingi Bilioni 130.7, mwaka 2015/16 mashirika 25 yalitoa gawio Shilingi Bilioni 249.3 na baada ya kuanza kuyabana mwaka jana 2016/17 mashirika 38 yalitoa gawio Serikalini lenye thamani ya Shilingi Bilioni 677” amesema Mhe. Rais Magufuli.

Aidha, Mhe. Rais Magufuli amemshukuru Spika wa Bunge Mhe. Job Yustino Ndugai na Wabunge wote kwa ushirikiano wao, na amesema anaamini kuwa mapendekezo ya kuanzisha Akaunti Jumuifu ya Serikali (Treasury Single Account – TSA) ambayo itasaidia kudhibiti fedha za Serikali kwa kupunguza idadi ya akaunti za Serikali kutoka 1,013 hadi takribani akaunti 100, yatapitishwa.