RC - KATAVI AZINDUA MSIMU MPYA 2025/2026 WA UNUNUZI WA ZAO LA PAMBA

Posted on: June 10th, 2025

Mkuu wa Mkoa wa Katavi  Mhe . Mwanamvua Mrindoko aliyevaa miwani akiwa na viongozi mbalimbali wa Serikali na wale wa vyama vya ushirika kama wanavyonekana tayari kwa uzinduzi wa  msimu wa ununuzi wa soko la zao la Pamba,wengine ni wananchi waliohudhuria hafula hiyo iliyofanyika Kijiji cha Kapalala Halmashauri ya wilaya ya Nsimbo Mkoa wa Katavi.

Na Kibada Ernest –GCO Katavi

Juni 9,2025

 RC - KATAVI   AZINDUA MSIMU MPYA WA MWAKA 2025/2026 WA UNUNUZI WA ZAO LA PAMBA  

 Msimu mpya wa ununuzi wa zao la Pamba maarufu kama (Dhahabu nyeupe) umefunguliwa  kwa wakulima wa mkoa wa Katavi huku wakionesha furaha yao kwa serikali  jinsi inavyotoa kipaumbele katika sekta ya kilimo ,akiongoza sherehe za ufunzi wa soko la Pamba Mkoa wa Katavi Mkuu wa Mkoa huo Mhe. Mwanamvua Mrindoko,amezindua  msimu wa ununuzi wa zao la pamba na mazao mengine kwa mwaka 2025/2026, hafla iliyofanyika katika Kijiji cha Kapalala, Halmashauri ya Wilaya ya Nsimbo.

Tukio la uzinduzi  limehudhuriwa na Viongozi mbalimbali wa  Serikali, vyama vya Ushirika  vya wakulima wa tumbaku (AMCOS), wakulima, na wadau mbalimbali wa sekta ya kilimo..

Akihutubia katika sherehe hizo za uzinduzi  , Mhe. Mrindoko amewaagiza Wakuu wa Wilaya  zote tatu Mkoani humo kusimamia kwa karibu uuzaji wa mazao kupitia vituo na mifumo rasmi ya Serikali ili kudhibiti uuzaji holela unaosababisha hasara kwa wakulima pamoja na uhaba wa chakula..

Katika hatua nyingie amesisitiza kuwa mazao ya Pamba na Tumbaku yanahusisha wakulima wengi mkoani humo yanapaswa kuendeshwa chini ya usimamizi makini wa vyama vya Msingi vya Ushirika.

 Ameeleza kuwa baadhi ya Viongozi wa vyama  hivyo wamekuwa wakikiuka taratibu kwa kuingia mikataba isiyo rasmi na wakulima, jambo linalowaumiza wakulima kibiashara. hivyo, amewaagiza Wakuu wa Wilaya kuhakikisha kilimo cha Mkataba kinasimamiwa kwa mujibu wa Kanuni, sheria,taratibu   na miongozo ya Serikali.

Aidha, Mkuu huyo wa Mkoa ametangaza Mkoa wa Katavi kuanza kutumia mfumo wa Stakabadhi  Mazao ghalani, kuanzia  zao la ufuta katika msimu huu wa 2025/2026.Pia amewahimiza wakulima kuunga mkono mfumo huo kwa kuwa unalenga kutoa bei nzuri, usalama wa soko, na kupunguza unyonyaji kutoka kwa walanguzi.

Vilevile Mkuu wa Mkoa Mhe. Mrindoko amewahimiza Vijana wa Katavi kutumia msimu huu kama fursa ya kuwekeza kwenye kilimo, akisisitiza kuwa ni sekta inayotoa ajira, kipato, na mchango mkubwa katika maendeleo ya taifa.

Ameipongeza kampuni ya NGS Investment Company Ltd kwa kuendelea kuwa soko la uhakika la zao la Pamba Mkoani humo,na kuwataka wakulima kuhakikisha wanavuna  pamba katika hali ya  usafi, kuipepeta vizuri na kuifikisha sokoni ikiwa katika ubora unaokubalika ili kukidhi mahitaji ya soko.

Naye Bugelaha Filbert akizungumza niaba ya Bodi ya Pamba, amesema kuwa ili mkulima anufaike na kilimo cha pamba, ni lazima azalishe kwa tija—kwa kutumia mbegu bora, mbolea, na matunzo sahihi. Ameeleza kuwa mkulima anaweza kuvuna hadi kilo 1,000 kwa hekari moja ikiwa atazingatia kanuni hizo.

Kwa upande wao, wakulima pamoja na wananchi   waliohudhuria hafla hiyo wameonesha kufurahishwa kwa  kuanza msimu mpya wa ununuzi wa pamba, wakisema kuwa matumizi ya mizani bora  ya kisasa yameongeza matumaini ya kupata haki katika vipimo. Hata hivyo wakaiomba Serikali kuhakikisha kuwa malipo ya pamba yanafanyika kwa wakati ili kuwawezesha kujipanga kwa msimu mwingine wa kilimo na shughuli za kijamii.

MWISHO.