SEMINA YA MAKARANI WAONGOZAJI UCHAGUZI

Posted on: October 25th, 2025

Makarani waongozaji wapiga kura waaswa kutenda haki bila ubaguzi

Msimamizi wa Uchaguzi wa Jimbo la Katavi, Edwin Itamba, amewataka makarani waongozaji wapiga kura kutekeleza majukumu yao kwa uadilifu na kutenda haki kwa wote bila ubaguzi. Akifungua mafunzo kwa makarani hao, Itamba alisema ni muhimu kuzingatia maelekezo watakayopewa ili wawe na uelewa wa pamoja na kuepuka kuwa chanzo cha malalamiko wakati wa uchaguzi.

Kwa upande wake, Mkuu wa Usalama wa Taifa Wilaya ya Mlele, Mnena Kasuku, aliwataka wasimamizi wote kufuata sheria, taratibu na kanuni zilizowekwa, akisisitiza kuwa wameaminiwa kutokana na uzalendo wao. Kasuku aliwataka pia kujiepusha na vitendo vyovyote vinavyoweza kusababisha uvunjifu wa amani au kuonesha upendeleo wa kisiasa.

Aidha, Wasimamizi Wasaidizi wa Jimbo la Katavi, Habiba Mtunguja na Luke Kifyias,Alex Bilia,Gerald Gandye kwa nyakati tofauti waliwakumbusha makarani hao kuwa waadilifu na kufuata maelekezo yote ya Tume ya Uchaguzi, wakisema kufanya hivyo kutasaidia kuhakikisha uchaguzi unakuwa huru, wa haki na wa amani.

Semina hiyo ya mafunzo imefunguliwa rasmi na inalenga kuwajengea uwezo makarani waongozaji wapiga kura ili waweze kutekeleza majukumu yao kwa ufanisi katika kipindi cha uchaguzi